الـلهجات الكويتيه و اختلافـها ، ممكن مساعدة ؟

السلام عليكم

موضوعي اليوم شوي غريب

عندي برزنتيشن عن تقيم حالة مريض من ثقافه اخرى

و الثقافه لا اعني فيها فقط من لغه اخرى ، كذلك اللهجه المختلفه

ابيكم تساعدوني لأني متوهقه بهالشغله شوي

الاختلافات بين اللهجه الحضريه و اللهجه البدويه في الكويت

غير الاختلافات التاليه :

اختلافات عامة : جيم ، دال مثال : ديايه = دجاجه الشده و الكسره ، مثال : يبيه ، جيييبييييه حذف الالف من البدايه ، ون = و أن ..ون شفتك = وأن شفتك .. الكاف و الجيم أشفيج = شفيك المد بالكلام : احنا = حنااااااااااا الكلمه بالكويتي الحضري الكلمه بالكويتي البدوي الياهل = الورع عقب = عقبن حق = حقت ويعه= وجع اقعد = اهجع غبار = عجاج (لهجه العجمان ) شنو تبي = ايش تبغى شنو اهوا = وشهو انطر اقهر ابي اروح = ابي انهج يلعب بالماي = يرطرط ليش = وشوله

يا ريت تذكرون اي شغله تطري ببالكم ، بشكل خاص للي يستخدمونها اليهال اكثر شي

و عندي جم سؤال بعد يا ريت تجاوبوني ؛ للي عنده المعرفه فقط .

اللهجات البدويه المتشابهه هي .. ؟ مثلاً : لهجه الرشايده تتشابه مع لهجه العوازم ؟ < مو متأكده ترا ، السموحه من اي احد اغلط بلهجته

المختلفه و المتميزه هي .. ؟ مع مثال حق جم كلمه ..

كلمات الحضر يقولونها عادي ، و البدو ياخذونها كاهانه او عيب تنقال ، مثلاً احد د.عبدالمحسن القحطاني الله يذكره بالخير مره قال الحضر يقولون للولد الصغير يا صبي ، البدو عندهم هالكلمه عيب و يقولون يا ولد مو يا صبي ..
فشنو كلمات ثانيه ممكن تضيفونها ؟

قاعده اعد مرجع لـاخصائيات النطق المستقبليات بهالشغله ، عشان يكون العلاج المقدم ادق و افضل و ما نغير لجهه الطفل لجهلنا بهالاختلافات خاصه الحضر منا < عن نفسي يعني

ابيكم تثقفوني بهالشغله ، خاصه اني اجهل هالاشياء كوني ما احتكيت بلهجات ثانيه غير العربيه الفصحى و الكويتيه الحضريه الى عمر متأخر .. : )

و شكراً لكم مقدماً ..

سبحان الله و بحمده