السلام عليكم ورحمة الله وبركاته
شخباركم ؟!
الموضوع :
في محاضره للحين راسخه في بالي وما راح انساها ابدأ .. تدرون ليه ؟!! انا اقولكم ليه ؟
في محاضرة اصولة التربيه تكلم الدكتور عن اختلاف مجتمعنا قديما ومجتمعنا بالوقت الحاضر … وفي سياق حديثه قال
مجتمعنا الان كل عائلة اكتفت في نفسها يعني ماصار الجار يزور جاره و انتهت فترة اهل الحاره ( الفريج ) اهلنا
واندثرت الجمله المعهوده كلنا معاكم في الرخاء والشده …
وانا فعلا كنت موافقه راي الدكتور لان فعلا مجتمعنا اختلف حييييييييييل وصار محد يسال عن الثاني كل شخص ماهمه
الا بيته وعياله … هذا اقصى هم افراد مجتمعنا
المهم الا في بنت تستأذن الدكتور تبي تتكلم .. واذن لها الدكتور
قالت : منو قال ان مجتمعنا اختلف .. انا جهراويه ومنطقتنا ابدأ ما تغيرت واهلها ماتغيروا حنا للحين اطباعنا مثل قبل
انا اعرف كل بيت في فريجنا .. للحين مازلنا مترابطين وفي وقت شدتنا تلاقي الكل واقف معانا بدون ما تربطنا علاقة قرابه
بس تربطنا علاقة جيره وعيش وملح … ما ادري عن المناطق الثانيه بس منطقتنا ماتغيرت تدري دكتور حنا ابوي لما يسافر
ولد جيرانا يجي ينام في الديوانيه لانه يقول ما ارضى على بنات جارنا ينامون بدون رجال
بعدها وحده تكلمت وقالت : ايه دكتور صاجه حنا في الجهراء حتى في العزايم ولد جيرانا يصف مع اخواني يستقبل الضيوف
وفي الافراح يكونون جيرانا معانا وحتى في وقت الشده مثل المرض والعزاء يكونون مثل اخوانا سند وعزوه .. قلوبنا على بعضنا
بصراااااااحه بصرراااااحه انا انصدمت ما توقعت ان في ناس للحين عايشين على طبع اول الطيبه والاخوه والسند
ترى حتى الدكتور انصدم ان للحين في ناس جذي
وعلى فكره سمعت بعد ان حتى الفطور يجتمعون الجيران طبعا الرياجيل في ديوانيه احد منهم ويفطرون مع بعض
ونفس الشي الحريم
هني انا تمنيت اكون من اهل الجهراء وساكنه فيها
الله لايغير عليكم يا أهل الجهراء ويخليكم لبعضكم …. ~~>> 
سؤالي الى مدى تغير مجتمع الكويتي عن قبل ؟! 
ناطره تعليقاتكم وردوودكم
اختكم
عهد