السلام عليكم ورحمة الله وبركاته
هذي أول مشاركة لي في المدونة.. ان شاء الله تعجبكم وتستفيدون 
في البداية أحب أسأل منو سمع عن مسابقة الأولمبياد؟ ما اتوقع وايد طلبة سمعوا عنها وفي بعض الطلبة مايدرون شنو الأولمبياد اساسا ..
الأولمبياد مسابقة علمية في عدة مجالات (الرياضيات، الكيمياء، الفيزياء، الأحياء، الفلك، علوم وغيرها) تقام بين الطلبة على مستويين : وطني ودولي.
الفئة العمرية: أولمبياد طلبة الصف التاسع ويكون في مجال العلوم فقط (بين 14-15 سنة )، وأولمبياد طلبة المرحلة الثانوية وللطالب حرية اختيار المجال اللي يناسبه سواء كان كيمياء او احياء او غيره ( بين 16-18 سنة).
مراحل المسابقة:
1- الوطني (على مستوى الكويت)
اولا: يقوم الاستاذ او الابله في اختيار الطلبه اللي يشوفونهم شطار واذكياء ويرشحونهم للمشاركة في المسابقة، ويقدر الطالب ان يشترك بنفسه بدون ترشيح الاستاذ له.. لكن بما ان مو وايد طلبة يدرون عن طبيعة المسابقة فماكو اقبال منهم للمشاركة.
ثانيا: يتم تدريب الطلبة على مستوى المنطقة التعليمية والتدريب غالبا يكون يومين في الاسبوع (يوم الاربعاء العصر ويوم السبت الصبح).
ثالثا: يقام امتحان تصفية للطلبة لاختيار الطلبة اللي راح يمثلون المنطقة التعليمية (غالبا 10 طلبة من كل منطقة تعليمية).
رابعا وأخيرا: يقام امتحان على مستوى الكويت بين جميع المناطق التعليمية ويتم تحديد الفائزين على مستوى الكويت في ثلاث فئات ذهبي، فضي وبرونزي (5 طلبة لكل فئة).
2-الدولي (على مستوى العالم)
اولا: يتم تدريب الطلبة ال15 الفائزين في الاولمبياد الوطني.
ثانيا: يتم عمل امتحان تصفية لهم (تصفية نهائية) لاختيار الطلبة الاوائل اللي راح يمثلون الوفد الكويتي. (( في اولمبياد المتوسط الوفد يتكون من 6 طلبة واولمبياد الثانوي الوفد يتكون من 4 طلبة))
ثالثا: يتم تدريب طلبة الوفد تدريب مكثف و على مستوى عالي استعدادا للمشاركة في المسابقة التي سوف تقام على مستوى العالم والتي تستضيفها دولة مختلفة كل سنة.
رابعا: يسافر الوفد الطلابي ممثلا دولة الكويت ويمتحنون امتحان على مستوى دول العالم.
بس للأسف في واايد اسباب لعدم اقبال الطلبة على الاولمبياد منها:
1- الاستاذة ماتكون عندهم فكرة كافية عن الاولمبياد فما يشجعون الطلبة انهم يشتركون عشان جذي وايد طلبة مايدرون عن الاولمبياد.
2- بعض الطلبة لهم القدرة انهم يشتركون ويحققون مراكز لكن للأسف يرفضون بحجة ان مايبون شي يلهيهم عن دراسة ويقولون "كافي الدراسة بالمدرسة بعد ليش نداوم دوام ثاني وندرس شي زيادة؟!"
3- المسابقة مو بس للطلبة المتفوقين (كما يعتقد بعض الاساتذة) لأن في وااااايد طلبة مو متفوقين ولكنهم شطار واذكياء في مادة معينة(على سبيل المثال الكيمياء) فتلاقيهم يحبون المادة و اييبون درجات زينة فيها ولو دشو الاولمبياد راح يقدرون يبدعون بإذن الله..
وانا كطالبة سابقة في الاولمبياد احب اقولكم شوي عن تجربتي الشخصية في الاولمبياد. في البداية طبعا ماكنت اعرف شنو الاولمبياد وشنو المسابقة الخ.. وماكنت اشترك في اي مسابقة علشان ما اتشتت بدراستي.. بس لما كنت في الصف الحادي عشر حبيت اجرب شي يديد ومرة الابلة سألت الصف منو يبي يشترك بالأولمبياد رفعت ايدي وبدت معاي وحدة من اجمل واروع التجارب اللي عشتها بحياتي.. داومت اول يوم وانا مادري شسالفة والابله شرحتلنا مراحل المسابقة ومن يومها طمحت اني اوصل للدولي وامثل دولتي والحمدلله حققت هدفي 
بصراحة هالتجربة تجربة فريدة من نوعها وتعلمت منها وايد اشياء اهمها اني انظم وقتي وأوازن بين دراستي في المدرسة ودراسة الاولمبياد، تعلمت اني اثق بنفسي وبقدراتي واني اقدر اوصل حق الشي اذا حطيته في بالي وسعيت له. وكسبت صداقات واااايد من الكويت ومن بره. واهم شي من هذا كله اني مثلت الكويت وهذا بروحه شرف لي
انا اشجع الطلبة انهم يشاركون في الاولمبياد لأنهم راح يستفيدون وايد ويخوضون تجربة حلوة..
سامحوني على الاطاله بس بصراحة الموضوع كبير وعميق والكلام فيه وايد لكن حاولت كثر ما اقدر اني اغطي كل الجوانب.. أتمنى أشوف ردودكم واذا عندكم أي سؤال أنا حاظرة =)
يعطيج العافيه بغيت اسال الاختبار كات اختياري ولا انتي تكتبين وكم ساعه كان الاختبار