ترتيبات دوره (كيف تكتب سيرتك الذاتيه باللغه الانجليزي بطريقه اكاديميه صحيحه ) – تعال دش شوف باي مجموعه انت ! =)

السلام عليكم ،

مع انتصاف العطله ، و بدايتها للبعض
حبيت اقدم لكم الدوره الاولى ، في سلسله دورات الكتابه التقنيه ؛
اسم الدوره : ( كيف تكتب سيرتك الذاتيه )

الفئه المستهدفه : اهما حديثي التخرج او للي للحين ما تخرجوا و كل من يرغب بالتعلم ؛)
اللغه : راح تكون باللغه الانجليزيه ، لأنه اغلب الشركات / الجامعات تعتمدها باللغه الانجليزيه + لأني متمرسه باللغه الانجليزيه و ما اعتقد راح اقدم لكم شي ذو جوده عاليه باللغه العربيه =)..

طبعاً هالدورات مجرد مساعده و شرح و تقديم مثال ، و استلام شغلكم مع تصحيحه و رده لكم
راح تبدي الدوره بشرح مبسط عن الكتابه التقنيه و شتفرق عن النثر
راح نشرح السيره الذاتيه بشكل عام ، بعدين ندش بالتفاصيل و ننهيها بمثال مضمون الصحه
راح نشرح الغلطات الشائعه و طرق تفاديها .

مده الدوره: راح نحددها حسب طلب المشتركين ، نقدر نقلصها بيوم او نمدها لمده اسبوع بحيث كل يوم نشرح جزئيه بسيطه مع امثله

الجدير بالذكر ان هالدوره هي مجرد حصيله من ما تعلمته في كلاس Technical writing عند الدكتور المتميز خالد شقير ، و للي بياخذ هالماده عنده سواء بجامعه الكويت او التربيه الاساسيه راح يستفيد من الدوره وايد =).

للي حاب يشترك يرسل لي رساله خاصه ، مع اقتراحه بمده الدوره و فترتها .. هل تبونها الحين ام بعد العيد ؟ ؛ علماً اني افضل انها تكون الحين عشان على بدايه الكورس نكون غطينا شغلات كثيره

الدوره راح تساعدكم على تحسين اللغه الانجليزيه كذلك =).. و راح اكون مسؤوله عنها 100% .. و حتى الدوكيومنتات للي راح تدزونها لي راح اراويكم الغلطات و اصححها لكم و اردها لكم برساله خاصه ..

بالنسبه للتصحيح و النصايح راح تكون شخصيه لكل مشترك بروحه .. برسايله الخاصه تفادياً للاحراج
اما الشغلات العامه راح تكون بموضوع مثبت =).

سارعوا بالتسجيل لأنه الاماكن محدوده

سبحان الله و بحمده